Story written by Jk
“പെൺമക്കളുടെ മക്കൾക്ക് ഒരു പന്തി ആൺമക്കളുടെ മക്കൾക്ക് മറ്റൊരു പന്തി ഇതിവിടെ നടക്കില്ല!!”
ദേഷ്യത്തോടെ രേഷ്മ വിളിച്ചു പറഞ്ഞു..
”” നീ എന്തൊക്കെയാ ഈ പറയുന്നത് ഇവിടെ ഇപ്പോൾ ആര് പക്ഷാഭേദം കാണിച്ചു എന്നാണ് പറയുന്നത്?? “
ഒന്നുമറിയാത്തതുപോലെ കല്യാണി ചോദിച്ചു..
”” അയ്യോ നിങ്ങൾക്ക് ഒന്നും അറിയില്ല അല്ലേ?? എല്ലാം സഹിച്ച് സർവ്വം സഹ ആയി നിൽക്കാൻ ഞാൻ നിങ്ങളുടെ മൂത്ത മകന്റെ ഭാര്യയല്ല!!”
രേഷ്മ വിളിച്ചു പറഞ്ഞപ്പോൾ കല്യാണിയുടെ ഇളയ മകൻ മനോജും അവളുടെ ഭാഗം നിന്നു.
”” നീ എന്തിനാ രേഷ്മേ വെറുതെ അമ്മയോട് ദേഷ്യപ്പെടുന്നത് ഇത് നിന്റെയും കൂടി വീടല്ലേ?? അച്ചു മോന് പാലോ തൈരോ വേണമെങ്കിൽ നിനക്ക് തന്നെ എടുത്തു കൊടുക്കാമല്ലോ!””
കല്യാണിയുടെ മകൾ അജിത പറഞ്ഞതും എല്ലാവരെയും ഒന്ന് തറപ്പിച്ചു നോക്കിക്കൊണ്ട് രേഷ്മ അകത്തേക്ക് കയറി.
എല്ലാം കണ്ടു ഒന്നും മിണ്ടാതെ അകത്തളത്തിൽ നിൽക്കുന്നുണ്ടായിരുന്നു സുജ..
കല്യാണിക്ക് നാല് മക്കൾ ആണ് രണ്ട് ആണും രണ്ടു പെണ്ണും.. മൂത്തത് മകളാണ്, ചിത്ര.. അവൾ ഭർത്താവിന്റെ വീട്ടിൽ നിന്ന് തെറ്റി ഇവിടെ വന്നു നിൽക്കുകയാണ്..ര ണ്ടാമത്തേത് മകനാണ് അജിത്ത്, ഒരു പാവം തന്റെ കുടുംബം എന്ന് പറഞ്ഞാൽ ജീവൻ കളയും…
ആ വീട്ടിലെ ചിലവ് മുഴുവൻ നോക്കുന്നത് അജിത്ത് ആണ്..
അതിനു താഴെയാണ് അജിത.. അമ്മായിയമ്മ ശരിയല്ല എന്നും പറഞ്ഞ് അവൾ വിവാഹം കഴിഞ്ഞതിന്റെ അടുത്തമാസം മുതൽ ഇവിടെയാണ് സ്ഥിരതാമസം.
ഏറ്റവും ഇളയത് മനോജ്.
മനോജിന് ബാങ്കിൽ ആണ് ജോലി നല്ല ശമ്പളം ഉണ്ട് എങ്കിൽ പോലും കുടുംബത്തിനുവേണ്ടി ഒരു രൂപ അവൻ ചെലവാക്കില്ല…
അജിത്ത് കല്യാണം കഴിച്ചു കൊണ്ട് വന്നിരിക്കുന്ന രേഷ്മയ്ക്ക് വില്ലേജ് ഓഫീസിൽ ജോലിയുണ്ട്.
അതുകൊണ്ടുതന്നെ അവരോട് ആരും കളിക്കാൻ നിൽക്കില്ല എന്നാൽ മൂത്ത മകന്റെ ഭാര്യയായ സുജയുടെ അവസ്ഥ അത് ആയിരുന്നില്ല.
ഒരു പാവപ്പെട്ട വീട്ടിൽ നിന്നാണ് സുജ വന്നത്.. അതുകൊണ്ടുതന്നെ അവളെ അവിടെ ആരും വിലവെച്ചിരുന്നില്ല…
അവൾക്കും മക്കൾക്കും അവർ ഒരു സ്ഥാനവും നൽകിയില്ല. അതിലൊന്നും സുജയ്ക്ക് പരാതി ഇല്ലായിരുന്നു അന്തിയോളം കഷ്ടപ്പെട്ട് അധ്വാനിച്ച് തളർന്നു വരുന്ന ഭർത്താവിനോട് അവൾ ഒന്നും പറഞ്ഞില്ല..
എല്ലാം മിണ്ടാതെ സഹിച്ചു അത് കല്യാണിക്കും മക്കൾക്കും കൂടുതൽ വളം ആയി.
ഒടുവിൽ മനോജ് രേഷ്മയെ കൊണ്ടുവന്ന് അവളോടും സുജയോട് കാണിച്ചതു പോലെ കാണിക്കാൻ തുടങ്ങിയപ്പോൾ രേഷ്മ ശക്തമായി പ്രതികരിച്ചു…
കല്യാണിക്ക് പെൺമക്കളും അവരുടെ മക്കളും കഴിഞ്ഞിട്ടേ ഉണ്ടായിരുന്നുള്ളൂ ആൺമക്കളുടെ കുഞ്ഞുങ്ങൾ..
വീട്ടിൽ പശു കൊണ്ട് അതിന്റെ പാല് ഒട്ടും വെള്ളം ചേർക്കാതെ പെൺമക്കളുടെ കുഞ്ഞുങ്ങൾക്ക് കൊടുക്കും..
എന്നാൽ അവിടുത്തെ ചെലവുകൾ എല്ലാം നോക്കുന്ന അജിത്തിന്റെ കുഞ്ഞുങ്ങളെ തിരിഞ്ഞു നോക്കുക പോലുമില്ല സുജ എല്ലാം സങ്കടത്തോടെ അങ്ങ് സഹിക്കും എന്നാൽ രേഷ്മ അങ്ങനെ ആയിരുന്നില്ല..
അത് മാത്രമല്ല മനോജിന്റെ പെങ്ങന്മാരോട് നിൽക്കേണ്ട സ്ഥാനത്ത് നിന്നില്ലെങ്കിൽ ഇവിടെനിന്ന് ഇറങ്ങി പൊയ്ക്കോളാൻ വരെ അവൾ പറഞ്ഞു..
അത് കേട്ടതും അജിത ഭർത്താവിനെ കൂട്ടി അയാളുടെ വീട്ടിലേക്ക് തിരികെ പോയി..
ചിത്ര അവിടെത്തന്നെ പിടിച്ചുനിന്നു.. തന്റെ കുടുംബത്തിൽ ഒരു പ്രശ്നം വേണ്ട എന്ന് കരുതി എല്ലാം സഹിക്കുകയായിരുന്നു അജിത്ത് ഇപ്പോൾ അവിടെ സുഖകരമായ അന്തരീക്ഷം അല്ല എന്ന് അവൻ മനസ്സിലാക്കി.
രേഷ്മ ഓരോ സമയത്തും വിളിച്ചു പറയുമ്പോൾ ആണ് ശരിക്കും അവിടെ എന്താണ് നടക്കുന്നത് എന്ന് അജിത്ത് മനസ്സിലാക്കുന്നത്.
കുറെയൊക്കെ കാര്യങ്ങൾ അവൻ തന്നെ മനസ്സിലാക്കി എടുത്തു തന്റെ മക്കളും ഭാര്യയും എത്രത്തോളം അവഗണന അനുഭവിക്കുന്നുണ്ട് എന്ന് അപ്പോഴാണ് അവന് മനസ്സിലായത്..
ഉടനെ അവൻ അവരെയും വിളിച്ച് അവിടെ നിന്ന് പടിയിറങ്ങി..
ആ വലിയ കുടുംബത്തിന് നോക്കാൻ വേണ്ടി കഷ്ടപ്പെട്ട് പണിയെടുക്കേണ്ടി വന്നിരുന്നു അജിത്തിന്.
എന്നാൽ അവിടെ നിന്ന് ഇറങ്ങിയപ്പോൾ അവന് കൂടുതൽ പണം ലാഭിക്കാൻ കഴിഞ്ഞു അതുകൊണ്ട് അവർ സ്ഥലം വാങ്ങി വീട് വച്ചു..
ചില പൊട്ടിത്തെ,റികൾ നല്ലതാണ് സ്വയം തിരിച്ചറിയാൻ അത് ഉപകരിക്കും.
അജിത്തും സുജയും കുട്ടികളും ആ വീട്ടിൽ നിന്ന് ഇറങ്ങിയതോടെ ആകെ അങ്കലാപ്പിലായത് കല്യാണിയും മകൾ ചിത്രയുമാണ്.
കാരണം ആ വീടിന്റെ മുഴുവൻ സാമ്പത്തിക കാര്യങ്ങളും നോക്കിയിരുന്നത് അജിത്തായിരുന്നു. എല്ലാ മാസവും ഒന്നാം തീയതി അജിത്ത് കൊണ്ടുവന്നു തരുന്ന പണം കൊണ്ടാണ് ആ വീട്ടിലെ അടുക്കള പുകഞ്ഞിരുന്നത്. അജിത്ത് പോയതോടെ കാര്യങ്ങൾ മാറിമറിഞ്ഞു.
രേഷ്മയും മനോജും ആ വീട്ടിൽ തന്നെ തുടർന്നു. വില്ലേജിൽ ജോലിയുള്ള രേഷ്മയോട് അധികം കളിക്കാൻ കല്യാണി നിന്നില്ല.
ചിത്രയുടെ മക്കൾക്ക് കൂടുതൽ പരിഗണന പഴയതുപോലെ കൊടുക്കാൻ കല്യാണി നോക്കിയപ്പോഴൊക്കെ രേഷ്മ അതിനെ ചോദ്യം ചെയ്തു.
“ഈ വീട്ടിലെ ചിലവ് നോക്കാൻ അജിത്തേട്ടൻ ഉണ്ടായിരുന്നപ്പോൾ നിങ്ങൾ സുഖിച്ചു. ഇപ്പോൾ തീറ്റ വാങ്ങാനും നോക്കാനും മനോജേട്ടൻ പണം തരണം. അങ്ങനെ വരുമ്പോൾ എന്റെ മോൻ അച്ചുവിനും നിങ്ങളുടെ മകളുടെ കുട്ടികളെ പോലെ ഇവിടെ തുല്യ അവകാശമുണ്ട്,” രേഷ്മ തുറന്നടിച്ചു.
മനോജ് നല്ല ശമ്പളം വാങ്ങുന്ന ആളാണെങ്കിലും കല്യാണിയുടെ കയ്യിലേക്ക് പണം കൊടുക്കാൻ തയ്യാറായില്ല.
അവൻ രേഷ്മയുടെ ആവശ്യങ്ങൾക്കും സ്വന്തം ആവശ്യങ്ങൾക്കും മാത്രമേ പണം ചിലവാക്കിയുള്ളൂ.
ചിത്രയ്ക്കും മക്കൾക്കും കൊടുക്കാൻ കല്യാണിയുടെ കയ്യിൽ പണമില്ലാതെയായി.
അജിത്ത് ഉണ്ടായിരുന്നപ്പോൾ ഇതൊന്നും അറിയാതെ സുഖമായി കഴിഞ്ഞവരാണ് ചിത്രയും അമ്മയും.
ഒരു ദിവസം ചിത്ര കല്യാണിയോട് പറഞ്ഞു, “അമ്മേ, അജിത്ത് പോയതോടെ ഇവിടെ ജീവിക്കാൻ ബുദ്ധിമുട്ടായി. മനോജും രേഷ്മയും നമുക്ക് ഒരു വിലയും തരുന്നില്ല. അമ്മ അജിത്തിനെ വിളിച്ച് തിരികെ വരാൻ പറ.
കല്യാണി അജിത്തിനെ ഫോണിൽ വിളിച്ചു… “മോനേ, നീ പോയതിൽ പിന്നെ ഇവിടെ വലിയ ബുദ്ധിമുട്ടാണ്. അനിയനും ഭാര്യയും എന്നെയും ചിത്രയെയും അനാവശ്യമായി കുറ്റപ്പെടുത്തുന്നു. നീ തിരിച്ചു വരണം,”
കല്യാണി കരഞ്ഞു പറഞ്ഞു.
എന്നാൽ അജിത്ത് ശാന്തമായി മറുപടി നൽകി: “അമ്മേ, ഞാൻ ഇത്രയും കാലം അധ്വാനിച്ചതൊക്കെ ആർക്ക് വേണ്ടിയായിരുന്നു? എന്റെ ഭാര്യയും മക്കളും അവിടെ ഒരു തുള്ളി പാലിന് വേണ്ടി പോലും സങ്കടപ്പെട്ടപ്പോൾ അമ്മ അത് കണ്ടില്ലെന്ന് നടിച്ചു.
അജിതയുടെയും ചിത്രയുടെയും മക്കൾക്ക് നിങ്ങൾ എല്ലാം കൊടുത്തു. എന്റെ മക്കൾക്ക് നിങ്ങൾ എന്ത് തന്നു? എന്റെ ഭാര്യ സുജ എല്ലാം സഹിച്ച് കരഞ്ഞു തീർത്തു.
ഇപ്പോഴാണ് ഞങ്ങൾക്ക് സമാധാനമായി ജീവിക്കാൻ പറ്റുന്നത്. ഞാൻ ഇനി അങ്ങോട്ട് വരുന്നില്ല.” അജിത്ത് ഫോൺ വെച്ചു.
അജിത്തിന്റെ മാറ്റം കല്യാണിയെ അത്ഭുതപ്പെടുത്തി. എപ്പോഴും അനുസരണയുള്ള മകനായിരുന്നു അവൻ.
അവനെ ഇത്രയും ശക്തനാക്കിയത് സുജയോടുള്ള സ്നേഹവും രേഷ്മയുടെ വാക്കുകളുമാണെന്ന് കല്യാണിക്ക് മനസ്സിലായി.
ഇതിനിടയിൽ വീട്ടിൽ മറ്റൊരു പ്രശ്നം ഉണ്ടായി. ചിത്രയുടെ ഭർത്താവ് സുരേഷ് അങ്ങോട്ട് വന്നു. ചിത്ര ഭർത്താവുമായി പിണങ്ങി വന്നിട്ട് മാസങ്ങളായിരുന്നു. സുരേഷ് വന്നത് ചിത്രയെ തിരികെ വിളിക്കാനല്ല, മറിച്ച് അവളിൽ നിന്ന് വിവാഹമോചനം ആവശ്യപ്പെടാനാണ്.
“നീ നിന്റെ അമ്മയുടെയും കുടുംബത്തിന്റെയും കൂടെ ജീവിച്ചാൽ മതി. എന്റെ കൂടെ വരാൻ താല്പര്യമില്ലാത്ത നിന്നെ എനിക്ക് ഇനി വേണ്ട,”
സുരേഷ് പറഞ്ഞു. ചിത്ര ആകെ വിഷമത്തിലായി. അവൾ മനോജിന്റെ സഹായം തേടി.
എന്നാൽ മനോജ് പറഞ്ഞു, “ചേച്ചി സ്വന്തം കാര്യം നോക്കി പോകുന്നതാണ് നല്ലത്. എപ്പോഴും ഈ വീട്ടിൽ വന്ന് നിൽക്കുന്നത് ശരിയല്ല.
എനിക്കും ഒരു കുടുംബമായി. എന്റെ ശമ്പളം കൊണ്ട് എല്ലാവരെയും നോക്കാൻ എനിക്ക് പറ്റില്ല.”
രേഷ്മയും മനോജിന്റെ വാദത്തെ പിന്തുണച്ചു. സ്വന്തം അനിയൻ പോലും കൈവിട്ടപ്പോൾ ചിത്രയ്ക്ക് തന്റെ തെറ്റുകൾ മനസ്സിലായി.
അജിത്ത് ഉണ്ടായിരുന്നപ്പോൾ അവൾ അവനെ ഒട്ടും ബഹുമാനിച്ചിരുന്നില്ല. സുജയെ ഒരു വേലക്കാരിയെപ്പോലെയാണ് കണ്ടിരുന്നത്.
ആ അജിത്തിന്റെ പണം കൊണ്ടാണ് താൻ ഇത്രയും കാലം ഇവിടെ സുഖമായി ജീവിച്ചതെന്ന് ചിത്ര തിരിച്ചറിഞ്ഞു.
ചിത്ര ഒടുവിൽ ഭർത്താവ് സുരേഷിനോട് ക്ഷമ ചോദിച്ചു. തന്റെ തെറ്റുകൾ തിരുത്തി അവൾ ഭർത്താവിന്റെ വീട്ടിലേക്ക് തിരികെ പോകാൻ തീരുമാനിച്ചു. മക്കൾക്കൊപ്പം ചിത്ര പടിയിറങ്ങുമ്പോൾ കല്യാണി ആകെ ഒറ്റപ്പെട്ടു.
ഇപ്പോൾ ആ വലിയ വീട്ടിൽ കല്യാണിയും മനോജും രേഷ്മയും മാത്രമായി. കല്യാണിക്ക് മുൻപത്തെപ്പോലെ ആ വീട്ടിൽ അധികാരം കാണിക്കാൻ കഴിഞ്ഞില്ല.
രേഷ്മ പറയുന്നതുപോലെ കാര്യങ്ങൾ നടന്നു. പശുവിന്റെ പാലും വീട്ടിലെ മറ്റ് സാധനങ്ങളും രേഷ്മയുടെ മകൻ അച്ചുവിന് കൃത്യമായി ലഭിച്ചു. കല്യാണിക്ക് പലപ്പോഴും അടുക്കളയിൽ രേഷ്മയെ സഹായിക്കേണ്ടി വന്നു.
മുൻപ് സുജയെക്കൊണ്ട് പണിയെടുപ്പിച്ചിരുന്ന കല്യാണിക്ക് ഇത് ഒരു വലിയ തിരിച്ചടിയായിരുന്നു. അതേസമയം, അജിത്തും സുജയും പുതിയ വീട്ടിൽ വളരെ സന്തോഷത്തോടെയാണ് കഴിഞ്ഞിരുന്നത്.
സുജയുടെ മുഖത്ത് ഇപ്പോൾ പണ്ടത്തെപ്പോലെ സങ്കടമില്ല. കുട്ടികൾ നല്ല സ്കൂളിൽ പഠിക്കുന്നു.
അജിത്തിന് സാമ്പത്തികമായി വലിയ നേട്ടമുണ്ടായി. മുൻപ് വലിയൊരു കുടുംബത്തിന്റെ ചിലവ് മുഴുവൻ നോക്കിയിരുന്നതിനാൽ അവന് ഒന്നും സമ്പാദിക്കാൻ കഴിഞ്ഞിരുന്നില്ല.
ഇപ്പോൾ സ്വന്തം ഭാര്യയ്ക്കും മക്കൾക്കും വേണ്ടി മാത്രം ചിലവാക്കുന്നതിനാൽ നല്ലൊരു തുക ബാങ്കിൽ സമ്പാദ്യമായി മാറ്റിവെക്കാൻ അവന് സാധിക്കുന്നുണ്ട്.
ഒരു ഞായറാഴ്ച അജിത്തും സുജയും കുട്ടികളും കൂടി കല്യാണിയെ കാണാൻ ആ പഴയ വീട്ടിലേക്ക് വന്നു. അവർ നല്ല വസ്ത്രങ്ങൾ ധരിച്ച്, സന്തോഷത്തോടെ വരുന്നത് കണ്ടപ്പോൾ കല്യാണിയുടെ കണ്ണ് നിറഞ്ഞു.
സുജ കല്യാണിയുടെ അടുത്ത് വന്ന് വിശേഷങ്ങൾ ചോദിച്ചു. അവൾക്ക് കല്യാണിയോട് ഇപ്പോൾ ഒട്ടും ദേഷ്യമില്ലായിരുന്നു.
കല്യാണി അജിത്തിന്റെ കൈകൾ പിടിച്ച് പറഞ്ഞു, “മോനേ, എന്നോട് ക്ഷമിക്കണം. ഞാൻ പണ്ട് കാണിച്ച പക്ഷാഭേദമാണ് ഈ കുടുംബം ഇങ്ങനെയാകാൻ കാരണം. പെൺമക്കളുടെ മക്കളോട് കാണിച്ച സ്നേഹം ഞാൻ നിങ്ങളുടെ കുട്ടികളോട് കാണിച്ചില്ല.
സുജയെ ഞാൻ ഒരുപാട് വിഷമിപ്പിച്ചു. അതിന്റെ ഫലമാണ് ഞാൻ ഇപ്പോൾ അനുഭവിക്കുന്നത്.”
അജിത്ത് അമ്മയെ ആശ്വസിപ്പിച്ചു, “അമ്മേ, അതൊന്നും സാരമില്ല. കഴിഞ്ഞതൊക്കെ കഴിഞ്ഞു. രേഷ്മ അന്ന് ആ പ്രശ്നം ഉണ്ടാക്കിയില്ലായിരുന്നെങ്കിൽ ഞാൻ ഇപ്പോഴും കാര്യങ്ങൾ അറിയാതെ അവിടെത്തന്നെ തുടരുമായിരുന്നു.
എന്റെ ഭാര്യയും മക്കളും എന്നും സങ്കടപ്പെടുമായിരുന്നു. ചില പൊട്ടിത്തെറികൾ നല്ലതാണെന്ന് പറയുന്നത് അതുകൊണ്ടാണ് അമ്മേ. അത് നമ്മളെ സ്വയം തിരിച്ചറിയാൻ സഹായിക്കും.”
അജിത്തും കുടുംബവും കുറച്ചു സമയം അവിടെ ചിലവഴിച്ച ശേഷം യാത്ര പറഞ്ഞു ഇറങ്ങി. അവർ കാറിൽ കയറി പോകുന്നത് നോക്കി കല്യാണി ഉമ്മറത്ത് തന്നെ നിന്നു.
തെറ്റുകൾ മനസ്സിലാക്കാൻ വൈകിയെങ്കിലും, സ്വന്തം മക്കളുടെ ജീവിതം നന്നായതിൽ അവർക്ക് ഒരു വശത്ത് സന്തോഷം തോന്നി. അധികാരം നഷ്ടപ്പെട്ടെങ്കിലും, ജീവിതത്തിലെ വലിയൊരു പാഠം കല്യാണി പഠിക്കുകയായിരുന്നു.